Под мотото „Енергијата е убава и еколошка“ денеска на Скопскиот саем е отворен 39. Меѓународен саем на металургија, електроника, енергетика, неметали, градежништво, обезбедување и заштита „ТЕХНОМА 2013“.
На површина од околу 12.000 метри квадратни, свој изложбен простор имаат над 200 домашни и странски компании од Италија, Грција, Бугарија, Словенија и Хрватска.
Манифестацијата ја отвори извршниот директор на Скопски саем Гвидо Омладич, кој оцени дека користењето на иновативни технологии ја подигнуваат свеста за важноста на квалитетот како најдобра бизнис практика за лансирање и промовирање на производите на саемските манифестации.
– ТЕХНОМА е една од најстарите, а секогаш нова бизнис ориентирана саемска манифестација која останува иновативна платформа за одржување, развивање и иницирање на бизниси од металургијата, електрониката, енергетиката, неметалите, градежништвото и обезбедувањето и заштитата, рече Омладич.
Паралелно со ТЕХНОМА 2013, која ќе трае до 19 октомври, на Скопски саем се одржуваат и 14. Меѓународен саем на занаетчиство и мало стопанство, 33. Меѓународна изложба на иновации – МАКИНОВА, како и Изложбата на агромеханизација како сегмент на 63. Меѓународен саем за широка потрошувачка АГРОФУД.
Како заеднички дел од АГРОФУД и ТЕХНОМА, во дворот пред Управната зграда на Скопски саем во тек е изложба на агромеханизација.