Четириесет и двајца невработени лица евидентирани во Агенцијата за вработување Куманово следат обука во рамки на програмата за самовработување, која е дел од владиниот опертивен план за намалување на невработеноста.
– Следно по завршување на обуката е подготовка на бизнис план за кој ќе им помогнат советници. Подготовката на бизнис планот исто така е вклучена во проектот, информира Младена Јаќимовска од кумановската Агенција за вработување.
Обуката е втор чекор од спроведувањето на проектот за кој во Куманово аплицирале 170 невработени.
Од кумановската Агенција информираат дека од 2007 година досега во Куманово отворени се над 350 бизниси и околу 90 отсто од нив успешно опстојуваат, дури има и фирми кои вработуваат по десетина невработени лица.
Со програмата за самовработување се предвидува можност за самовработување со добивање грант од 3.000 евра за основање и реализација на сопствен бизнис. Овие средства може да се наменат и за набавка на опрема и репроматеријали.