Во 2009 година во земјите-членки на ЕУ живееле околу 96 милиони млади луѓе, на возраст од 15 до 30 години.
Во повеќето земји на ЕУ задолжителното образование завршува на возраст меѓу 14 и 17 години и од оваа возраст натаму младите луѓе избираат дали ќе продолжат со своето високо образование или да станат економски активни, пренесува БТА.
Просечната возраст за напуштање на формалното образование и почнување со работа од младите луѓе во ЕУ е 21 година, покажа анализата на Евростат, посветена на преминот од образование кон првата значајна работа.
Најрано на пазарот на трудот излегуваат младите во Малта и Турција (исто така земја што е вклучена во истражувањето) или просечно на околу 18-годишна возраст.
Според податоците од анализата, приближно 70 отсто од младите на возраст од 15 до 30 години кои го напуштиле образованието имале значајни тешкотии при наоѓањето на првата работа, а околу 30 отсто воопшто не успеале да најдат работа. Ова е така затоа шро речиси секој трет млад човек, кој го напуштил образованието и побарал работа, имал низок потенцијал за влегување на пазарот на трудот, покажа анализата.
Највисоки вредности на вработеност кај младите на возраст од 15 до 30 години се регистрирани во Холандија и Норвешка- 88 отсто, Швајцарија – 87 отсто, Австрија – 84 отсто, Луксембург – 82 отсто, Кипар и Данска – 81 отсто, Германија и Словенија – 80 отсто.
Најниски податоци за вработување на младите луѓе се регистрирани во Литванија, Латвија и Унгарија – под 30 отсто.
Бугарија, заедно со Романија, е во „златната средина“ на оваа своевидна класификација на вработеноста на младите – малку над 30 отсто.