Владата на Сириза има мандат да најде одржливо решение за економијата во рамките на еврозоната, изјави заменик – премиерот на Грција Јанис Драгасакис во интервју за „Гардијан“.
– Ние немаме мандат да ја извадиме Грција од еврозоната, и тоа не е опција ниту за Владата, ниту за Сириза, рече тој пред состанокот на Еврогрупата закажан за 11 мај, додавајќи дека тие имаат „ мандат за одржливо решение, во рамките на еврозоната“.
Драгасакис е оптимист дека ќе се постигне решение, истакнувајќи дека „разговорите, досега, покажаа оти постои заедничка основа со промени и политички мерки и, според тоа, верува дека е можен договор во интерес на сите“.
Тој додаде дека сите страни треба да соработуваат за да се реши прашањето на ликвидност, и истакна дека Владата знаела оти преговорите ќе бидат тешки.
– Знаевме дека, како први во Европа кои се обидуват да ја сменат политиката, работите ќе бидат тешки. Тројката (странски кредитори) не беше само три институции туку систем на моќ, држава во држава, вистинската власт на земјата. Моравме да го промениме овој систем, да ги промениме правилата на игра, изјави заменик-премиерот на Грција.