Со настап на Националниот ансамбл за народни песни и игри „Танец“ вечерва во Охрид ќе биде отворено годинашното 52-ро по ред издание Балканскиот фестивал на народни песни и игри.
Во периодот до 11 јули Охрид ќе биде домаќин на познати културно-уметнички друштва и ансамбли од Балканот и пошироко, на оваа најстара фолклорна манифестација што ги афирмира културните достоинства на народите на Балканот.
Според најавите, „Танец“ вечерва ќе настапи со програма што досега не е презентирана пред македонската публика, односно со целосно нови поставки, како и обновени кореографии на богатото македонско фолкорно наследство.
Летната сцена на „Долни Сарај“ во наредните пет фестивалски дена ќе биде местото каде своите вештини во играта и песната на своите народи ќе ги презентираат ансамблите „Осиек 1862“ од истоимениот град во Хрватска, „Абант Изет Бејсал“ од Бејсал – Турција, „Светозар Марковиќ“ од Крагуевац – Србија, „Отекс“ од Охрид, „Златица“ од Бугарија, „Марблени“ од шпанскиот град Гирона, „Бисери“ од Охрид, „Пролетер“ од Сараево – БиХ, „Трисчеле“ од Агриџенто на Сицилија, „Зора“ од унгарскиот град Мохач, „Курпинка“ од Кадизло во Полска и ансамблот „Никола Јонков Вапцаров“ од Скопје.
Во текот на петдецениската традиција на Балканскиот фестивал на отворените сцени во Охрид имаат настапено повеќе од 50 илјади пејачи, играорци и инструменталисти од Македонија, Албанија, Бугарија, Грција, Србија, Црна Гора, Босна и Херцеговина, Хрватска, Словенија, Романија, Унгарија, Австрија, Италија, Турција, Кипар, како и од Франција, Шпанија, Холандија, Германија, Русија, Молдавија, Полска, Чешка, Словачка, Белгија, Шведска, Данска, Финска, Велика Британија, Австралија, САД, Канада, Мексико, Малезија, Коста Рика, Нигерија и други.
Манифестацијата ќе ја отвори нејзиниот покровител, претседателот на Собранието на Република Македонија Трајко Вељаноски. Влезот за настапите на сите културно-уметнички друштва е бесплатен.
Поради нестабилното време и неповолните временски прилики наместо на Долни Сарај свеченото отворање на Фестивалот ќе се одржи на алтернативната сцена, во Големата сала на Центарот за култура „Григор Прличев“.