Hад седумдесет кучиња-скитници гравитираат на подрачјето на општина Крива Паланка, поради што општината почна со интензивни активности на терен за решавање на овој проблем.
Веќе е склучен договор со лиценцирана фирма за заловување и третирање на бездомните кучиња на територијата на општината Крива Паланка и отпочна да врши заловување на кучињата.
Општинските служби за информирање посочуваат дека отпочната е имплементација на одредбите од Законот за заштита и благосостојба на животните, во делот на контрола на популацијата на кучињата во градот и приградските населби.
– Оваа активност покрај тоа што претставува законска обврска, е резултат и на големиот број на поплаки од страна на граѓани во изминатиот период. Периодов надлежните инспекциско-редарски служби извршија теренско согледување и анализа на бројот на кучиња кои слободно се движат на одредени територии, при што е констатирано дека по улиците и населбите има над 70 – тина кучиња, од нив околу 20 – тина кучиња имаат соодветни обележја на вратот, што укажува на фактот дека веројатно истите имаат сопственици, информираат од општината.
Оттаму апелираа до сите сопственици на кучиња да бидат одговорни, односно согласно законската регулатива и одговорно сопствеништво, посочувајќи дека општината нема да носи никаква одговорност ако бидат заловени некои од кучињата кои се неконтролирано пуштени во населбите и по улиците.
Од страна на надлежните служби во тек е лоцирање на неодговорните сопственици кои ги напуштаат домашните миленици и против нив ќе бидат преземени соодветни мерки.
Согласно укажувањата на Агенцијата за храна и ветеринарство, општината Крива Паланка во најскоро време ќе донесе програма и буџет наменет за субвенционирање на кастрација и ојаловување на женските кучиња кои имаат сопственик со што ќе се промовира одговорното сопствеништво, а крајниот резултат ќе биде намалување на бројот на бездомните животни.
Агенцијата за храна и ветеринарство е во фаза на набавка на 100.000 микрочипови со кои бесплатно ќе се идентификуваат кучињата кои се чуваат како домашни миленици, заради што е потребно сопствениците своите кучиња миленици да ги пријават во ветеринарните станици.