Повеќе од 200 учесници од Европа, Азија, Африка и Јужна Америка присуствуваа на дводневниот Меѓународен научен симпозиум посветен на т.н. следна генерација дијагностички процедури и можностите за нивната примена во различните медицински гранки што се одржа во Македонската академија на науките и уметностите во Скопје.
Симпозиумот, како што информираат од МАНУ ги отвора вратите за воведување на најсовремени дијагностички процедури и персонализираната медицина во Република Македонија.
Овие процедури претставуваат најсовремени генетски анализи кои овозможуваат анализа на целокупниот геном на пациентот, а се извонредно значајни во дијагностиката на наследните и особено малигните болести. Анализите овозможуваат утврдување на сите генетски дефекти кои се причина за појава на болеста, а врз основа на тоа и аплицирање на најсоодветна терапија, која е токсична само за малигните клетки и не е штетна за здравите клетки и ткива.
Организатори на симпозиумот се академик Момир Поленаковиќ од МАНУ и академик Димитар Ефремов од Интернационалниот центар за генетски инженеринг и биотехнологија од Трст, Италија. На симпозиумот учестваа врвни експерти од водечки медицински центри во Шведска, Германија, Велика Британија, Холандија, Швајцарија, Италија и Грција. Меѓу учесниците беше и професор Ана Ведел, претседател на Комитетот за Нобелова награда во медицината.
