Има простор за договор меѓу инвеститорот Џи Сол и транспортерите кои одбија да возат руда за Фени се додека не им се исплатат заостанатите долгови, смета вицепремиерот за економски прашања Кочо Анѓушев.
– Се прават сите напори фабриката да се рестартира. Мислам дека има добар предлог спрема транспортерите и дека и тие како и вработените ќе бидат обештетени и ќе се договорат да продолжат да работат. Владата не може да ги води преговорите, туку Џи Сол како инвеститор и транспортерите како засегната страна. Ние сме тука да ги охрабриме да направат договор и ќе направиме се што е во наша моќ, рече Анѓушев одговарајќи на прашање по потпишувањето договор за државна помош со компанијата „ВИК“ во Владата.
Владата ќе ја поддржи било која компанија што ќе ги плати сите обврски на доверителите на Фени.
– Владата не го води процесот и не е во позиција да прифаќа или да одбива понуди. Кој ќе понуди најмногу кон одборот на доверители, а за тоа се отвора пат во сегашната стечајна постапка со планот за реструктуирање, тој на крај ќе биде сопственик на Фени и тоа ќе го одлучи одборот на доверители, собранието на доверители, стечајниот управител и стечајниот судија во рамките на судот во кој се води процесот, рече Анѓушев.