Во основниот суд Кавадарци отворена е стечајна постапка за „Еуроникел индустри“ или поранешно Фени Индустри, а за стечаен управник е назначен Ацо Петров од Скопје.
Стечајниот предмет беше поведен по предлог на тројца доверители: прилепска компанија, јавно претпријатие од Кавадарци, како и вработените во фабриката.
Претставниците на доверителите, рекоа дека сметаат оти покрај обврските, компанијата има и имот од кој би можела да се формира стечајна маса и да се намират доверителите преку неа.
На рочиштето беше презентиран извештајот од досегашната привремена стечајна управничка, Љубица Зајкоска од Прилеп, за економско – финансиска состојба на „Еуроникел“ и според податоците од последните перт години фирмата постојано била во добивка.
Зајкоска појасни дека 670 вработени побаруваат по четири плати во вкупен износ од 133.823.193 денари или 2,18 милиони евра.
Таа додаде дека книговодствено, компанијата има побарувања и од домашни и странски субјекти и од државни институции, но нивната веродостојност ќе се испита во отворената стечајна постапка.