Градоначалникот на Штип, Благој Бочварски денеска се сретна со градоначалникот на Општина Гоце Делчев од Бугарија, Владимир Москов. Ова е нивна втора средба, откако претходно Бочварски беше во посета на општината Гоце Делчев.
– Денеска градоначалникот Москов и неговиот тим се во посета на нашата Општина. Ќе посетиме неколку локалитети во Општина Штип. Пред сѐ, ставам акцент на идната соработка во делот на ИНТЕРРЕГ-ИПА Програмата за прекугранична соработка помеѓу Р. Бугарија и Р. Македонија во периодот од 2014 до 2020 година. Преговараме за да аплицираме заедно и да добиеме проекти од овој фонд, со тоа што разговараме за објекти и проекти во делот на туризмот. Она што е интересно и важно за граѓаните на Општина Штип е дека ние ќе настапиме и ќе аплицираме, ќе се договараме и ќе преговараме заедно со Општина Гоце Делчев за проекти од културното наследство на нашиот град, Исарот, штипско Ново село, за енергетски ефикасни објекти, училишта, за подобрување на инфраструктурата на училиштата, како и пристапни рампи за лицата со посебни потреби. Едно општинско училиште би можело да влезе овде како проект, но сега сме сѐ уште во фаза на преговарање и разговори, рече Бочварски.
Тој додаде дека кога ќе се финализираат преговорите и разговорите јавноста ќе биде информирана за конкретните предлози.