Кандидатот за градоначалник на општина Прилеп од коалицијата предводена од СДСМ, Илија Јованоски денеска во изјава за медиумите рече дека во неговата програма има мерки и планови за урбан град и за урбанизација на населените места.
– Во соработка со Европската банка за обнова и развој и со средства од ИПА фондовите на Европската Унија, како и други донатори, ќе ја заокружиме финансиската конструкција и ќе инвестираме во енергетска ефикасност на приватните колективни објекти, на индивидуалните станбени објекти во Прилеп и околните населени места. Индустриските објекти, како и објектите коишто се во надлежност на локалната и централната власт, ќе имаат можност да добијат енергетски ефикасни фасади и квалитетно и ефикасно осветлување, рече Јованоски.
Тој додаде дека сите училишта и градинки во општината ќе добијат енергетско-ефикасни фасади и покривни решенија и дека ќе се изврши замена на осветлувањето со енергетско-ефикасно осветлување со користење на ЛЕД диодни светилки.
– Јавното осветлување во градот ќе биде изведено со фото-волтаични системи и ЛЕД диоди и со сензори за синхронизација со дневната светлина. Ќе имаме светли улици, светол град. Паралелно ќе ги намалиме трошоците на граѓаните за електрична енергија и светилки. Во пакет со гасификацијата, ќе воведеме и централно греење. Оваа мерка значително ќе влијае врз намалување на трошоците за енергија, но ќе спречи и загадувањето на градот, рече Јоановски и додаде дека овие проекти ќе бидат реализирани со пари од странски фондови и донатори.
