Заеднички концерт со настап на пејачки групи и играорци реализираа денеска во Кавадарци повеќе збратимени пензионерски здруженија од земјава и од српскиот град Лесковац.
Гостите од Србија се претставија со неколку фолклорни точки и инсерти од драматизацијата „Коштана“. Домаќините настапија со пејачката и играорната група од културно уметничкото друштво „Лоза“, кое функционира во рамките на Здружението на пензионери.
– Имаме најразлични активности како здружение. Покрај културно забавните содржини, пружаме помош, организираме мерење на крвен притисок и шеќер во крвта. Учествуваме со 30 проценти во трошоците за бањско лекување, а со 50 во вакцинацијата. Спроведуваме спортски натпревари и активности за одмор и рекреација. Успеавме во последните неколку години нашите пензионери да прошетаат не само низ Македонија, туку и низ цела Европа, рече Фруска Костадиновска, секретар во кавадаречкото Здружение.
Претседателот на Здружение на пензионери од Кочани нагласи дека нивната програма за работа се испреплетува со таа на Кавадарци.
– Соработуваме во културно забавниот живот но и на спортски план. Побратимувањето не е само формалност, туку тоа и практично живее. Соработуваме, разменуваме мислења и заеднички делуваме како здруженија и се на дополнуваме. Имаме широка соработка. Чест ни е што сме тука со нашиот ансамбл, рече Серафимов.
Плодната и сестрана соработка ја истакна и Груица Манасиев, претседател на Здружение на пензионери од Пробиштип.
– Ние како помало здружение многу учиме од нашето братско здружение, рече Манасиев.