„Денес ќе објавиме конкретен случај каде СДС ја става Државната изборна комисија во функција на партијата.
Скандалозно и спротивно на изборните правила и закони е присуството на претседателката Марија Петковска на Општинската изборна комисија на партиски конвенции на СДС.
Скандалозно и целосно незаконски е претседателот на ОИК Кратово да стои во првите редови на партиска конвенција за промоција на кандидати за градоначалник и листа на советници во Кратово.
Наместо да тера избори и да се грижи за нивната исправност и регуларност, претседателката на Општинската изборна комисија тера политика и седи на партиски конвенции на СДС.
Дали ова значи дека ДИК под Чичаковски е во функција на СДС.
Државната изборна комисија е независен орган кој треба да го регулира и организира изборниот процес. ДИК мора да вложува континуирани напори за да одржува репутација за независност, непристрасност, одговорност и професионалност во работењето.
Ова е недозволиво и имплицира дека ДИК ќе работи и ќе делува во полза на СДС и Зоран Заев.
ВМРО-ДПМНЕ апелира сите надлежни, вклучително и преставништвата на меѓународната заедница да го осудат овој недозволив чин, а ДИК да ја разреши Марија Петковска претседателката на ОИК Кратово.
ВМРО-ДПМНЕ сериозно предупредува дека сите чинители во изборниот процес треба да се однесуваат исклучиво согласно законот, а не да бидат партиски марионети на партијата на власт.
Секоја злоупотреба не смее да помине неказнета. За секое законско прекршување мора да има одговорност.
ВМРО-ДПМНЕ ги уверува сите прекршители на законите, мотивирани или исилени од СДС И Зоран Заев дека ќе одговараат со враќање на правната држава и демократија.
На претстојните локални избори на 15-ти октомври граѓаните ќе му кажат НЕ на Зоран Заев и неговото расипничко и незаконско управување со државните институции“, изјави Бојан Стојаноски .