Советот на општина Кавадарци денеска ја усвои Програмата за „Тиквешки Гроздобер 2017“, со мнозинство гласови. Организацијата на манифестацијата ќе се реализира на 7, 8, 9, и 10 септември со средства во износ од 5.970. 000 денари. Од општинскиот буџет ќе се издвојат четири милиони денари.
Според најавата, на 7 септември Советот ќе одржи свечена седница по повод денот на ослободувањето на Кавадарци, а потоа ќе се одржи концерт посветен на песната на доајенот на македонската народна музика Никола Бадев.ж
Отворање на Гроздоберот е предвидено за 8 септември од 12 часот со изложба во Музеј галеријата, а од 13 часот ќе се дегустираат грозје и вина на градскиот плоштад. За вечерта се планирани концерти на „Чили плеј бенд“ и „Нокаут“, а на полноќ ќе се избираат крал и кралица на гроздоберот.
Во сабота на 9 септември во програмата се таблијадата, приемот на делегации од страна на градоначалникот и карневалското дефиле и уметнички перформанс. Потоа за присутните на манифестацијата целовечерен концерт ќе има музичката ѕвезда Северина.
За 10 септември планирани се настапи на ДЏ Никифор и Депеш мод – трибјут.