Заменикот министерот за животна средина и просторно планирање Јани Макрадули, како претставник на македонската делегација, учествува на неформален состанок на министри за животна средина кој денеска и утре се одржува во Талин, Естонија.
Од Министерството информираат дека еко-иновациите и забрзување на транзицијата кон поодржлив начин на живот се приоритет на Естонското претседателство, споделено со трио партнерите Бугарија и Австрија.
– Со оглед дека една од целите на одржливиот развој на Обединетите Нации за справување со најитните социјални и еколошки предизвици е обезбедување на модели за одржлива потрошувачка и производство, на состанокот е нагласена потребата од целосно преструктуирање на линеарните модели на производство и користење на отпадот, во корист на заокружен систем, каде што производите ќе бидат дизајнирани и пласирани на пазарот за повторна употреба и рециклирање, стои во соопштението на МЖСПП.
На првиот ден од средбата, министрите размениле ставови во три важни под теми од темата за еко-иновации: транспарентност на производите, паметни градови и финансирање. Вториот ден ќе биде посветен на климатските промени и ќе се дискутира за очекувањата, можностите и потенцијалните предизвици поврзани со промовирање на визијата и целите на Парискиот договор.
Во рамки на состанокот Макрадули, остварил билатерална средба со заменик генералениот секретар на Министерството за животна средина на Естонија, Мелис Мунт на која било истакнато значењето за соработка во примената на новите технологии и информатичката технологија во борбата за заштита и унапредување на здрава животна околина и средина.