Полска го поддржува проширувањето на Северноатланската алијанса на југ и на исток, бидејќи не сака да остане на периферијата на НАТО, изјави денеска полскиот претседател Анджеј Дуда.
На Меѓународната конференција за безбедносни прашања ГЛОБСЕК-2017 во Братислава, Дуда посочи дека Полска сака трансатлантската заедница да биде отворена за нови држави.
– Полска сака трансатлантската заедница со учество на нашиот регион да остане отворена за нови држави. Целта на Централна Европа е да биде глас на таквата политика како во однос на Европска унија, така и во однос на НАТО. Во наш интерес е да го направиме тоа, со цел да не останеме засекогаш граничен регион, истакна Дуда.
Тој додаде дека проширувањето на НАТО на исток и на југ ќе значи и проширување на зоната на стабилност.