Во библиотеката „Искра“ од Кочани континуирано се зголемува книжниот фонд, кој сега изнесува 99.109 книги од кои 49.372 се книги наменети за возрасни, додека 27.458 се наслови наменети за деца.
– Минатата година набавивме 1.166 наслови со 3.847 примероци на книги од кои со сопствени средства се купени 664 наслови или 2.371 примерок, изјави Марија Анастасова, од кочанската библиотека.
Таа истакна дека со проектот на Владата минатата година библиотеката од Кочани го зголемила книжниот фонд за 191 наслов или 491 примерок на книги.
Тенденцијата за зголемување на книжниот фонд, нагласи, продолжува и годинава. Досега се набавени стотина наслови претежно училишна лектира и белетристика, додека од прокетот на Владата се добиени 10 наслови со 60 примероци стручна литература.
Библиотеката од Кочани посебна грижа води за зголемување на бројот на читателите. Досега во библиотеката бројот на членовите изнесува 1.700 со тенденција за негово зголемување. За ваквиот интерес за членување во библиотеката посебно место има начинот на популаризација на книгата кај најмладите читатели, особено кај првачињеата кои стануваат членови на библиотеката по автоматизам.