Колумбискиот претседател Хуан Мануел Сантос и командатот на бунтовнцичката организација Револуционерски вооружени сили на Колумбија (ФАРК) Родриго Лондоно потпишаа историска мировна спогодба, со која се става крај на конфликтот кој трае веќе половина век и во кој загинаа околу 250 илјади лица.
Церемонијата на потпишување се одржа во конференцискиот центар на колумбискиот град Картагена во присуство на стотици високи функционери, меѓу кои генералниот секретар на Обединетите нации Бан Ки-мун, кубанскиот претседател Раул Кастро, американскиот државен секретар Џон Кери.
Сантос и Лондоно, познат под воениот прекар Тимошенко, ја потпишаа спогодбата со пенкало изработено од куршум, на кое беше испишана фразата: „Куршумите го пишуваат нашето минато, образованието нашата иднина“.
По потпишувањето Сантос и Лондоно се ракуваа, а сите присутни на церемонијата, чија бројка изнесуваше над две илјади лица, беа облечени во бело како симбол на мирот.
Сантос изјави по потпишувањето дека спогодбата ќе и помогне на Колумбија да ги спречи убиствата и ги повика Колумбијците да го одобрат договорот на референдумот закажан за 2 октомври, на кој ќе биде одредени дали тој ќе стапи во сила.
Лондоно го нарече Сантос „смел партнер“ во постигнувањето на спогодбата, до која се стигна по четиригодишни преговори и го означи договорот како „победа за колумбиското општество и меѓународната заедница“.
Со спогодбата меѓудругото се предвидува учество на ФАРК во политиката, транзициско судство за воените злосторства, земјоделски реформи, реинтеграција на демобилизираните бунтовници во граѓанскиот живот.