Водата за пиење на туристичкиот центар Попова Шапка е загадена, покажуваат последните испитувања на Центарот за јавно здравје Тетово. Од таму истакнуваат дека загадувањето е резултат на неодржување на резервоарите на водата за пиење.
Од Јавното комунално претпријатие Тетово, кое е одговорно за оддржување на системот не даваат никаков одговор дали ќе преземат нешто за прочистување на водата и зошто нема известување за фекалното загадување на водата.
Вода за пиење нема ниту во националниот парк Пелистер. Таму пред два-три дена на чешмите на Голема Ливада, Бегова Чешма и други локации беа истакнати написи дека водата е забранета за пиење.
Анализите на Центарот за јавно здравје на планинските води на Пелистер покажале 9 проценти хемиска и 77 проценти бактериолошка неисправност.
Во најстариот национален парк во земјава и по десет години не е дограден колекторскиот систем. Изградбата започна во 2006 година кога беше поставена колекторска мрежа од 2,5 километри, а остана да се изгради и постави прочистителна станица и да се приклучат објектите на Пелистер кон мрежата.