Во Тирана денеска почна заседание на Парламентарното собрание на НАТО, а според нејзиниот претседател Мајкл Р. Тарнер тема на состанокот, меѓу другото, ќе биде „агресивниот став на Русија“, тероризмот и масовните миграции, јави Танјуг.
Околу 250 парламентарци од 28 држави членки на НАТО и партнерски земји се собраа во албанската престолнина за да разговараат за одговорот на Алијансата на низата предизвици во пресрет на самитот на НАТО во јули во Варшава.
На собранието се очекува да се усвои декларација во која, меѓу другото, лидерите на Алијансата ќе се повикаат да ја засилат својата колективна одбрана и превентивно делување, да развијат сеопфатна стратегија за промоција на стабилноста во северна Африка и на Блискиот исток и да ја засилат соработката со Европската Унија, наведуваат американските медиуми, повикувајќи се на нацрт декларацијата.
Поради заседанието на Парламентарното собрание на НАТО во Тирана во сила се високи безбедносни мерки, кои вклучуваат активно учество на 600 полицајци и припадници на безбедносните сили.