Европратениците Иво Вајгл, Ричард Ховит и Едуард Кукан, кои од вчера се наоѓаат во посета на Македонија, денеска ќе имаат средба во ДИК, а треба да се сретнат и со специјалната обвинителка Катица Јанева.
Тројката европратеници кои посредуваа во напорите за постигнување на договорот од Пржино, вчера имаа средба со лидерите на СДСМ Зоран Заев, на ДУИ Али Ахмети и на ДПА Мендух Тачи. Исто така, имаа и разговори со високи претставници на ВМРО-ДПМНЕ поради тоа што лидерот на оваа партија и премиер Никола Груевски е во посета на САД.
Целта на посетата е да ги охрабрат политичките партии да се забрза усвојувањето на преостанатите обврски од договорот.
Вајгл, Ховит и Кукан по денешните средби најавија изјава за медиумите на која ќе ги соопштат нивните согледувања од одржаните средби во врска со спроведувањето на договорот од Пржино.
По тројцата европарламентарци, в петок во Скопје доаѓа и еврокомесарот за преговори за проширување Јоханес Хан со цел да направи увид во спроведувањето на договорот, чија крајна цел е одржување на предвремени парламентарни избори на 24 април годинава. Посетата на Хан се очекува да се поклопи со изборот на техничка Влада и на нов привремен премиер, со единствена задача спроведување на предвремените избори.