Нестабилно време со пороен дожд, грмежи и засилен ветар се очекуваат во четврток и петок, особено во северните и источните делови од земјава, предупредуваат од Управата за хидрометеорологија
Ваквите временски промени се условени од влажна и нестабилна воздушна маса од исток во која ќе се најде територијата на Македонија.
Локално можно е врнежите да бидат поинтензивни. Врнежи ќе има и во вечерните часови кои сепак ќе бидат полокализирани. Преку денот ќе дува умерен североисточен ветар.
И во петок времето ќе биде променливо и нестабилно облачно со пороен дожд, грмежи и засилен североисточен ветар. На места можно е процесите да бидат поинтензивни, локално во форма на невреме.
За време на викендот, во јужните и планински делови се уште ќе има услови за локална појава на краткотраен дожд и ретки грмежи.