Екипите на Барселона и Баерн Минхен се првите полуфиналисти во Лигата на шампионите откако синоќа постигнаа победи во реванш четвртфиналните дуели.
Барселона и во вториот дуел го победи ПСЖ. На „Камп Ноу“ стрелец на двата гола беше Нејмар (14 и 34.минута) и со вкупни 5:1 го елиминира францускиот шампион.
Баерн пред своите навивачи ги анулираше 3:1 на Порто од првиот натпревар и на „Алијанц Арена“ славеше со убеливи 6:1 и со вкупни 7:4 избори полуфинале.
Баерн брзо дојде до потребната разлика. Алкантара донесе водство (14.минута), а Жером Боатенг зголеми на 2:0 (22). Третиот гол го постигна Роберт Ленадовски (27), а четвртиот гол го постигна Томас Милер (36). Левандовски вторпат (40) ја погоди мрежата за 5:0 што беше резултат на првиот дел. Единствениот гол за Порто го постигна Џексон Мартинез (73), а конечните 6:1 ги постави Чаби Алонсо (88).
Вечерва се играат другите два четвртфинални дуела: Атлетико Мадрид – Реал Мадрид (0:0 прв натпревар) и Монако – Јувентус (0:1).