Вооружениот маж, кој денеска држеше неколку луѓе како заложници во пошта во Коломб во близина на Париз, е уапсен, а заложниците се ослободени, соопшти полицијата.
Француските медиуми пренесуваат дека ниту еден од заложниците не бил повреден.
Заложничката криза започна околу 12 часот, кога маж со огнено оружје се затворил во поштенска филијала во Коломб, соопшти анонимен полициски извор, без да објави колку лица има внатре.
Некои од полициските извори изјавија дека најмалку едно вооружено лице држи како заложници меѓу две и пет лица.
Засега нема индикации дали овој инцидент е поврзан со минатонеделните исламистички напади во Париз.
На местото на заложничката криза веднаш пристигнале голем број полицајци, како и претставници на обвинителството.
Француската телевизија БФМ претходно објави дека „идентификуван маж“ земал заложници во пошта во Коломб, во близина на Париз, и дека инцидентот нема терористички карактер. Според локалните медиуми киднаперот е вооружен со оружје со мал калибар и држи седум заложници.