Ветерани-инвалиди од Војната во Хрватска од 1991 до 1993 година веќе петти ден протестираат пред зградата на Министерството за воени ветерани во Загреб, со барање оставка на ресорниот министер Предраг Матиќ и двајца негови блиски соработници.
Матиќ пристигнувајќи во својата канцеларија, децидно одби разговор со новинарите кои го чекаа за изјава. Тој само и оддаде почит на Невенка Топалушиќ, 60-годишна ветеранка од Војната со стопроцентна инвалидност, која почина во текот на ноќта меѓу вторникот и средата за време на протестот пред Министерството.
Многу жители на Загреб се насобраа за да им дадат поддршка на воените ветерани, а во пресрет излезе и Црвениот крст, кој им даде ќебиња, храна и пијалаци на демонстрантите.
Вчера беше одржан помен за почината Топалушиќ, на кој присуствува неколкустотици луѓе, кои палеа свеќи на местото на кое таа почина.