Во Техничкиот музеј во Загреб отворена е изложба „Југотон-источно од рајот/1947-1991“, мултимедиски проект за визуелна и поп култура и технологија, продукција и производство на најголемата дискографска куќа во поранешна Југославија.
Низ призма на дизајн, архитектура и визуелна уметност и приказ за технолошкиот процес од снимање до производство, се покажува „оделото“ и „лицето“ на популарната музика, истакнуваат организаторите на изложбата.
Прикажан е голем број омоти за грамофонски плочи, плакати, фотографии, оригинални скици и изработки на домашни и странски автори, знаци и логоа, архитектонски планови, нацрти на простории на Југотон и други материјали како – одлуки на Работнички совет, книга на впечатоци, документирани фотографии и останато. Изложбата ќе трае до крајот на ноември.