Богатите земји во светот не реагираа доволно брзо на појавата на епидемијата на ебола, бидејќи болеста се појави во Африка, изјави поранешниот генерален секретар на Обединетите нации, Кофи Анан во емисија за британската телевизија Би-Би-Си.
– Мошне сум разочаран од реакцијата на епидемијата…разочаран сум од меѓународната заедница поради тоа што не реагираше побрзо, истакна Анан во емисиајта „Њузнајт“.
– Доколку кризата избиеше во некој друг регион во светот, веројатно на неа ќе се реагираше поинаку. Всушност кога ќе го разгледате развојот на кризата, меѓународната заедница се разбуди дури кога болеста се појави во Америка и Европа, нагласи тој.
Анан, дипломат од Гана, истакна дека би требало да биде јасно дека само прашање на време е кога вирусот ќе се прошири од својот епицентар во западна Африка.
– Одговорни за тоа ги сметам владите, кои имаат моќ. Африканските земји можеа да сторат малку повеќе, односно би можеле многу побрзо да побараат помош, додека меѓународната заедница би можела многу подобро да се организира за да пружи помош, рече Анан.