Водата на реката Луда Мара доби црна боја а во дел од градот Кавадарци од неа се шири и непријатна миризба. Од јавното претпријатие „Комуналец“ од овој град денеска информираат дека причината е во затната канализација на кавадаречката улица Слога.
– Поради затнување на канализацијата дошло до преливање на фекалиите во атмосферската канализација која завршува во реката. Интензивно работиме на отстранување на проблемот и тој ќе биде решен најбрзо што може, соопшти Марјан Прескакулев, раководител на работната единица за водовод и канализација при комуналното претпријатие.
Тој апелираше до кавадарчани да бидат совесни и да не фрлаат комиње во канализациите за да не доаѓа до нивно затнување.