ВМРО-ДПМНЕ во реакцијата на прес-конференцијата на СДСМ за одлив на лекарски кадар посочува дека наводите се тешка хипокризија бидејќи македонското здравство беше само застарена опрема и запоставени здравствени работници.
– Дегутантна и трагикомична е ваква изјава од партијата која го остави здравството со апарати од осумдесеттите години, која никогаш не се сети да покачи плата на здравствени работници, која ја остави брзата помош во најголем дел со стари и целосно амортизирани возила, која дозволуваше безмилосно да се крчми буџетот на здравството со овозможување на немилосрдно високи заработки на веледрогериите блиски до партијата, но и со набавка на ѓердани и поклончиња за пријателките и соработничките во време кога во целата држава имаше само еден апарат за магнетна резонанца кој повремено работеше, и крш лади стари по 20 години со кои се транспортираа пациентите, се наведува во соопштението од ВМРО-ДПМНЕ.
Потсетуваат дека за период од само една година од приватното во јавното здравство се вратија над 151 специјалисти.
Еден од врвните приоритети на Владата предводена од ВМРО-ДПМНЕ е зајакнувањето на кадарот во јавните здравствени установи, унапредување на знаењата и вештините на докторите, со цел подобар квалитет на здравствената заштита во државата.