Трите жални врби, уметничко дело на скулпторката Искра Димитрова кои се поставени во Вардар, меѓу Камениот и мостот „Око“, наместо со вода – сосема се обиколени со ѓубре. Бетонските постаменти на трите врби наречени Вера, Љубов и Надеж се високо над нивото на водата односно на отпадоците што ги опкружуваат.
Проектот „Скопје 2014“, иако уште незавршен веќе покажува знаци на распаѓење – позеленети споменици, распукани споменици, стиропор наместо бетон. Со ова почнаа да се остваруваат предупредувањата на експертите градежници и архитекти дека овие градби се скапи само на хартија, но се изработени од исклучително неквалитетни и евтини материјали и дека со текот на времето ќе се распаднат.
Врбите во Вардар беа поставени во април 2012 година. Тие беа една од првите скулптури поставени како дел од проектот „Скопје 2014“ и предизвика контроверзи заради сумата од 250 илјади евра колку што чинеа, а за кои, според отчетот на Министерството за култура, на авторката и’ биле исплатени околу 30 илјади евра, кое што, потоа таа го негираше и тврдеше дека добила авторски хонорар од 500 евра.
Одржувањето на спомениците од Скопје 2014 од 1 јануари го презеде Град Скопје.
А.Б.