Нови скулптури на деветте старогрчки музи на уметноста се поставени меѓу столбовите помеѓу Агенцијата за електронски комуникации и Јавното обвинителство на кејот од Вардар.
Додека пак, на двата краеви на колонадата, на столбови од двете страни има и два нови бронзени лава. Овој нов објект од проектот „Скопје 2014“ што треба да потсетува на старогрчка архитектура е наречен „Независна Македонија“.
Инвеститор е Општина Центар со одлука на претходното раководство кога градоначалник беше Владимир Тодоровиќ.
Само лиењето во бронза на деветте скулптури и на лавовите што е направено во РЖ-Институт чини 412 илјади евра. Во овој договор за лиење не влегуваат хонорарите на авторите, ниту пак материјалот и изработката на скулптурите.
Автори на скулптурите на деветте музи се професорите на ФЛУ Беди Ибрахим Жарко Башески и Богоја Ангелкоски, а Мирослав Славковиќ е автор на новите златни лавови.
