Кремљ во вторникот ги отфрли споредбите на претстојната средба на лидерите на Русија, Кина и САД со конференцијата во Јалта од 1945 година, оценувајќи ги како „игри на политиколози“.
Средбата на рускиот претседател Владимир Путин, кинескиот претседател Си Џинпинг и американскиот претседател Доналд Трамп ќе се одржи во четврток во кинескиот град Шенжен, на маргините на самитот на АПЕК.
Најавата за средбата поттикна споредби со разговорите на сојузничките лидери за време на Втората светска војна, на кои беа договорени сферите на влијание на големите сили и беа поставени темелите на повоениот поредок во Европа.
Портпаролот на Кремљ, Дмитриј Песков, ги отфрли ваквите споредби, посочувајќи дека најмалку две од земјите учеснички, Русија и Кина, се залагаат за мултиполарен светски поредок во кој на другите држави не им се наметнуваат одлуки.
„Тоа се игри на политиколози и немаат никаква врска со реалноста“, изјави Песков пред новинарите, пренесе руската новинска агенција „Интерфакс“.
„Тврдењето дека некој има намера да одлучува за судбината на светот сигурно не се однесува на Русија, ниту на Кина. Не сакаме никој да одлучува за нашата судбина и никогаш нема да се обидеме да одлучуваме за судбината на другите“, додаде тој.
Песков ја опиша претстојната средба како исклучително важна, истакнувајќи дека досега немало ваков состанок.
Портпаролката на кинеското Министерство за надворешни работи, Мао Нинг, во Пекинг изјави дека ова ќе биде прва средба во живо на лидерите на Кина, Русија и САД.
Таа не откри детали за агендата на состанокот, но нагласи дека посилната комуникација меѓу тројцата лидери, управувањето со меѓусебните разлики и стабилизирањето на односите се во интерес на сите три држави.
Песков потврди дека дел од средбата ќе биде отворен за медиумите.
