Полското државно обвинителство најави дека масакрот во Краков, во кој вчера беа убиени шест лица, ќе го истражува како кривично дело со терористички карактер. Ова е нов развој во истрагата, откако во нападот и во домот на напаѓачот беа пронајдени вкупно девет тела.
Портпаролот на Окружното обвинителство во Краков, Томаш Вашчук, за ТВП Инфо изјави дека обвинителството денеска планира формално да отвори истрага и нападот правно да го квалификува како терористичко кривично дело.
Сепак, тоа не значи дека терористички мотив е веќе потврден. Истражителите сè уште се обидуваат да утврдат што го поттикнало 24-годишниот Михал О. да го изврши крвавиот напад.
Вашчук соопшти дека осомничениот поради тешките повреди сè уште не е сослушан, ниту формално е уапсен во процесна смисла.
Михал О. се наоѓа во болница, откако полицајците го ранија при интервенцијата. Тој бил опериран и постојано е под полициско обезбедување.
„Доколку неговата здравствена состојба доволно се подобри за да можеме да ги спроведеме процесните дејствија, ќе го направиме тоа“, изјави Вашчук.
За кривичните дела за кои се товари, предвидена е и доживотна затворска казна.
Истражителите продолжуваат со претреси на локациите поврзани со нападот и собирање снимки од надзорните камери, со цел да се реконструира движењето на напаѓачот.
Посебно внимание ќе биде посветено на неговото минато, личните контакти и околностите под кои го набавил оружјето. Според досегашните информации, 24-годишникот имал дозвола за поседување оружје и претходно не бил осудуван.
Полскиот министер за внатрешни работи Марчин Кирвински претходно изјави дека напаѓачот застапувал многу радикални ставови. Се споменуваше и можна поврзаност со екстремно десничарски идеологии, но засега не е потврдено дека тоа бил мотивот за нападот.
Според досегашните информации, 24-годишникот вчера нешто по 15 часот со автомобил влегол на главниот плоштад во Краков и почнал да пука во минувачите. Убил шест лица, а ранил уште 15, меѓу кои и двајца полицајци кои учествувале во неговото совладување.
По пукањето, полицијата во неговиот дом во Островец Швјентокшиски пронашла уште три тела. Потврдено е дека станува збор за неговите родители и сестра. Околностите под кои починале и тие се предмет на истрага.
Поради трагедијата, Полска прогласи дводневна национална жалост, додека во Краков жалоста ќе трае до среда.