Финскиот претседател Александар Стуб ги демантираше извештаите во западните медиуми во кои се тврди дека рускиот претседател Владимир Путин, за време на телефонски разговор со него и со норвешкиот премиер Јонас Гар Сторе, им одржал „предавање“ за словенската историја, наместо да разговара за решавање на украинската криза. Стуб нагласи дека разговорот бил фокусиран на војната во Украина и на можностите за дипломатско решение, пренесува „РИА Новости“.
„Тоа не е точно; со други зборови, станува збор за неточна информација“, изјави финскиот претседател, одговарајќи на новинарско прашање во врска со тврдењата дека Путин поголемиот дел од разговорот го посветил на историски теми.
Неговиот одговор уследи по напис во британскиот весник „Фајненшел тајмс“ (Financial Times), кој, повикувајќи се на неименувани извори, објави дека рускиот претседател за време на разговорот со двајцата нордиски лидери опширно зборувал за средновековната словенска историја, додека неговите соговорници главно слушале.
Телефонскиот разговор се одржа во вторникот, 27 октомври, на иницијатива на Стуб и Сторе, кои со Путин разговараа за можностите за деескалација на тензиите и за дипломатските напори за ставање крај на конфликтот во Украина. Двајцата лидери не настапија како официјални претставници на Европската Унија, туку во својство на претседател на Финска, односно премиер на Норвешка. Стуб појасни дека, за време на разговорот, Путин ја изнел својата перспектива за настаните во Украина од 2014 година наваму – вклучително и случувањата на Крим и во Донбас – како и за околностите околу преговорите што се водеа во Истанбул во 2022 година.
Тврдењата на британскиот весник претходно ги демантираше и норвешкиот премиер Јонас Гар Сторе, кој побара корекција на објавениот текст.
„Тоа не е точно. Побаравме од ’Фајненшел тајмс‘ да ја корегира информацијата, бидејќи таа не одговара на реалноста“, изјави Сторе.
Тој појасни дека, иако Путин навистина разговарал за настаните од 2014 година до денес, тој го отфрли тврдењето дека Путин одржал предавање за словенската историја. Според Сторе, разговорот траел приближно 90 минути, при што учесниците имале отприлика еднакво време за да ги изнесат своите ставови. Сепак, британскиот весник одби да го измени текстот, наведувајќи дека стои зад своето известување.
Стаб, исто така, истакна дека контактот со Москва бил воспоставен на барање на украинската страна, додавајќи дека моментот за разговорот бил добро избран.
Разговорот меѓу Путин, финскиот претседател и норвешкиот премиер се одвиваше во време на подготовки за нова рунда преговори – во кои ќе учествуваат претставници од Русија, Украина и САД – закажана за ноември во Абу Даби. Според соопштението од Кремљ, Путин за време на разговорот повторил дека трајно решение за украинската криза е можно само доколку се земат предвид безбедносните интереси на Русија.
Обновувањето на директните контакти со Москва истовремено поттикна дебата меѓу европските држави во врска со идната улога на Европа во преговорите за Украина – особено со оглед на тоа што Вашингтон има водечка улога во дипломатските напори за ставање крај на конфликтот.