Европските безбедносни и разузнавачки служби истражуваат дали Русија стои зад координираните анонимни дојави за бомби упатени оваа недела до европските авиокомпании, поради кои беа приземјени десетици авиони, пишува денеска весникот „Фајненшел тајмс“ (FT).
Иако одредени припадници на европската разузнавачка заедница сметаат дека Русија е најверојатниот виновник, официјалните лица предупредуваат дека е потребно уште многу работа за одговорноста да може со сигурност да се утврди, наведува FT.
Како што е наведено, истрагата би можела да потрае, а можно е и да не доведе до конечен заклучок.
Истражителите проценуваат дека заканите биле упатени од проруски активисти или хакерски групи, но засега не е јасно дали руските разузнавачки служби ги насочувале, поттикнувале или ги одобрувале нивните активности.
Во авионите што беа мета на дојавите не беше пронајден експлозив, а во инцидентите не е уочен јасен образец. Закани оваа недела беа упатени и до ирските медиумски куќи.
Според проценките на истражителите, целта на ваквите активности е да се предизвика попречување во секојдневниот живот, да се вознемири јавноста и да се поткопа довербата во способноста на владите да ги заштитат граѓаните.
Разузнавачките официјални лица не сметаат дека постои непосредна закана за европската авијација, но предупредуваат дека цивилниот воздушен сообраќај е погоден за предизвикување нарушувања.
Повеќе од 1.500 дојави во 2023 година
Лажните дојави за бомби и претходно беа користени во кампањи за кои се сомневаше дека се поврзани со Русија.
Во октомври 2023 година, повеќе од 1.500 неосновани дојави за бомби беа испратени до училишта и градинки во Литванија. Вилнус тогаш зборуваше за умешаност на еден државен актер, додека разузнавачките кругови одговорноста им ја припишуваа на руските активисти, веројатно со поттик од Кремљ.
Оваа недела само една организација наводно презеде одговорност за една од заканите. По дојавата упатена до аеродромот „Фјумичино“ во Рим во четвртокот, руската организација „Male State“ беше наведена како автор, но нејзиниот основач Владислав Поздњаков ја негираше умешаноста.
Останатите пораки беа испратени од различни анонимни профили и локации ширум светот, а некои беа напишани на јазиците на земјите до кои беа упатени. За една од нив е утврдено дека потекнува од Колумбија.
Во пораката упатена до ирските медиумски организации во петокот беше наведено дека авторите регрутираат жители на европските земји и дека стекнале пристап до компромитирани уреди, сервери и профили. Автентичноста на тие тврдења не е потврдена.
Заканите за бомби вчера нарушија најмалку 18 летови ширум Европа, а медиумските организации во Ирска, Велика Британија и Бугарија исто така беа загрозени како последица на очигледно координиран и континуиран обид да се предизвика хаос, наведува „Гардијан“.