Флавио Болсонаро ја избриша објавата во која од САД се прогласи за избран претседател на Бразил, а потоа објави нова верзија во која тврди дека е „лидер“ на земјата. Изборните власти соопштија дека изборите, на кои победи Луиз Инасио Лула да Силва, биле спроведени во согласност со законот, објави Ројтерс.
Болсонаро првично ја објави пораката на социјалната мрежа Икс по пристигнувањето во Мајами, а потоа ја замени со нова верзија.
„Сакам да им кажам не само на моите 60 милиони гласачи, туку и на бразилскиот народ, дека јас сум лидерот и дека криминалците кои ги украдоа изборите во Бразил се дел од криминална организација што воспостави тиранија“, напиша тој.
Болсонаро не приложи докази за наводната изборна измама.
Претседателот на изборната власт, Касио Нуњес Маркес, соопшти дека изборите биле спроведени целосно во согласност со законските и уставните правила, без директно да се осврне на писмото на Болсонаро. Победата на Лула ја признаа Федералниот изборен суд, светските лидери, меѓународните набљудувачи и партијата на Болсонаро.
Запрашан за изјавите на Болсонаро, американскиот претседател Доналд Трамп одби да коментира, но повтори дека станувало збор за „многу чудни избори“.
Трамп им одобри визи на Болсонаро и на членовите на неговото семејство. Лула претходно го обвини Вашингтон дека соработува со семејството Болсонаро за да му помогне да се врати на власт, што САД го негираат. Стејт департментот, кабинетот на Лула и Врховниот суд не одговорија веднаш на прашањата на Ројтерс.
Болсонаро тајно го напушти Бразил откако Врховниот суд нареди да му биде одземен пасошот во рамките на истрага за перење пари, во која тој ја негира вината. Во писмото тврди дека не избегал, туку заминал за да се заштити себеси и семејството од „лов на вештерки“.
Лула оваа недела изјави дека е срамно што Болсонаро не останал во Бразил за да ја докаже својата невиност.
Болсонаро го оспорува изборниот резултат повикувајќи се на одлуката на судија на Врховниот суд, назначен од Лула, гласањето во неделата да биде продолжено за два часа. Тимот на Лула побарал продолжување поради наводи за попречување на гласањето во североисточните сојузни држави, но и тимот на Болсонаро побарал продолжување поради дождот на конзервативниот југ.
Болсонаро ги загуби изборите со разлика од околу 4,5 милиони гласови. Според анализата на професорот Педро Бургос од Институтот „Инспер“, во дополнителните два часа гласале помалку од 35.000 луѓе, односно околу 0,03 проценти од вкупниот број гласови. Аналитичарите сметаат дека барањето за поништување на изборите има мали шанси за успех.
Неговиот татко, поранешниот претседател Жаир Болсонаро, исто така замина во САД откако во 2022 година не го призна поразот од Лула. Подоцна се врати во Бразил и беше осуден на 27 години затвор поради планирање државен удар.