Кина во саботата, на Генералното собрание на ОН, зазеде став против Соединетите Американски Држави.
Во говорот по тој повод, Кина повика на почитување на суверенитетот на земјите од Заливот и побара „релевантната држава“ да престане со заканите кон Куба и да ја укине блокадата, пренесе Ројтерс.
Потпретседателот Хан Женг не ги спомена експлицитно САД. Вашингтон започна кампања на притисок врз Куба, која во голема мера ги блокира испораките на нафта кон островот. Конфликтот меѓу САД и Иран започна со американско-израелските напади во февруари.
Коментарите на Хан се во остра спротивност со пријателската атмосфера од почетокот на неделата, кога претседателот Доналд Трамп го прими кинескиот лидер Си Џинпинг во Белата куќа, со прелети на воени авиони и свечена државна вечера.
„Големите сили имаат посебна одговорност за зачувување на меѓународниот мир и безбедност. Тие мора да бидат пример во почитувањето на правилата, владеењето на правото и постапувањето исправно“, рече Хан, додавајќи: „Кина смета дека суверенитетот и безбедноста на земјите од Блискиот Исток, вклучително и оние од Заливот, мора да се почитуваат“.
Во текот на разговорите во Вашингтон, Трамп го предупреди Си да не го поддржува Иран. Предупредувањето следеше по извештаите дека Пекинг му доставил на Иран преносливи системи за противвоздушна одбрана и дека Техеран, со кинеска помош, пронашол начини да ги заобиколи санкциите за продажба на нафта. Амбасадорот на САД во Кина во петокот изјави дека Трамп добил уверувања дека Кина нема да го прави тоа.
Позив за укинување на блокадата на Куба
Во делот од говорот посветен на Куба, Хан изјави: „Кина ја повикува релевантната земја веднаш да престане со заканите за употреба на сила против Куба и веднаш и целосно да ја укине блокадата и санкциите“.
Електроенергетскиот систем на Куба доживеа целосен колапс претходно овој месец, оставајќи ја целата земја во мрак, а милиони луѓе без електрична енергија.
Застарениот енергетски систем со години беше под притисок поради недостигот на гориво и дотраената инфраструктура, но американската блокада на увозот на нафта, воведена во јануари, дополнително го влоши недостигот на електрична енергија и доведе до чести дефекти на мрежата.
Во својот говор, Хан исто така ја претстави Кина како сигурен глобален партнер и заштитник на земјите во развој.
„Кина смета дека сите земји, без разлика дали се големи или мали, се рамноправни членки на меѓународната заедница и дека глобалните прашања мора да се решаваат преку консултации“, рече тој.