Откако Германија директно ја обвини Русија за вмешаност во обидот за напад со дрон врз аеродромот во Лајпциг, германскиот дипломат Бернд Финке е повикан на разговор во Москва.
Финке, кој во Русија ја извршува функцијата вршител на должноста амбасадор на Германија, бил повикан во Министерството за надворешни работи на Русија поради, како што е наведено, антируските активности на Берлин.
По овој потег се огласи и руското Министерство за надворешни работи.
„Германскиот вршител на должноста амбасадор во Москва беше повикан во руското Министерство за надворешни работи и му беше кажано дека Русија одлучно ги отфрла целосно неоснованите обвинувања на Германија во врска со инцидентот во Лајпциг. Одлуката за затворање на рускиот генерален конзулат во Бон и Рускиот дом во Берлин претставува чекор кон конечно уништување на односите меѓу Русија и Германија“, соопшти руското МНР.
Од руската страна истакнале и дека Берлин намерно предизвикал провокација со цел да ја ескалира состојбата во билатералните односи.
На крајот, потезите што ги презела Германија ги опишале како антируски и најавиле остар одговор од Москва.