Иран порача дека има двегодишен план за справување со проширените американски санкции, откако Вашингтон започна нова кампања за економски притисок врз Техеран, која американскиот министер за финансии Скот Бесент ја нарече „економски Ден Д“.
Иранскиот министер за економија Али Маданизадех изјави дека земјата е „целосно подготвена за американските санкции“ и оцени дека и овој обид на Вашингтон ќе заврши без успех.
Iranian Economy Minister Madanizadeh on US sanctions:
We have been waiting for these days for a long time, and we knew what plans they had.
The government has a two-year plan and was completely ready for these events to happen.
The unipolar world is over, and they will… pic.twitter.com/9KSphBQ6WK
— Clash Report (@clashreport) August 24, 2026
„Владата е подготвена и беше подготвена. Имаме двегодишен план за управување со овие настани. Имаме и сопствени алатки и знаеме како да ја играме оваа игра“, изјави Маданизадех за иранската државна телевизија.
Тој додаде дека Техеран „долго време ги очекувал овие планови“.
Бесент вчера ја претстави операцијата „Economic Outcast“, нова американска кампања со која Вашингтон сака дополнително да го изолира Иран од глобалниот финансиски систем.
„Нашата цел е да ја прекинеме секоја економска врска што го одржува овој режим, додека Техеран не остане сам“, порача Бесент.
Американското Министерство за финансии ја прошири можноста за воведување санкции на дигитални средства, технологија, злато, воздухопловство и поморски транспорт, а санкционираше речиси 60 компании, лица и бродови поврзани со Иран.
Вашингтон им се заканува и на државите, банките и компаниите кои ќе продолжат да соработуваат со Иран.
Бесент не наведе конкретен рок за прекин на таквите врски, но порача дека САД „немаат бесконечно трпение“ и дека брзо ќе дејствуваат против оние кои продолжуваат да му помагаат на Техеран.
Маданизадех изјави дека Кина и Русија не ги прифатиле новите американски мерки и очекува и други земји да им се спротивстават.
Кинеското Министерство за надворешни работи порача дека санкциите и притисокот не помагаат во решавањето на проблемите и дека Пекинг ќе ги преземе потребните мерки за да ги заштити своите интереси.
Ова е особено важно за Иран бидејќи најголемиот дел од неговата нафта завршува во Кина, која и претходно не ги признаваше едностраните американски санкции.
Во меѓувреме, Иран повторно ги предупреди бродовите да не минуваат низ Ормускиот Теснец без негова дозвола.
Техеран исто така се закани дека, доколку војната продолжи, би можел целосно да го запре извозот на нафта од регионот.
Во нормални услови, низ Ормускиот Теснец минува околу една петтина од светската трговија со нафта и гас. Поради тоа, нарушувањата предизвикани од почетокот на конфликтот значително ги зголемија цените на енергентите.
Цената на Брент вчера беше околу 92 долари за барел.
Дејвид Оксли од „Capital Economics“ смета дека новите санкции можеби нема значително да ги намалат приходите на Иран од нафта, бидејќи трговијата и досега беше силно ограничена, а околу 90 отсто од иранскиот извоз на нафта оди во Кина.
Американската администрација, сепак, тврди дека овојпат не сака само да ги ограничи одделни трговски канали, туку да ја прекине целата мрежа на банки, посредници, превозници и компании кои му овозможуваат на Иран да ги заобиколува постојните санкции.