Хрватскиот министер за надворешни работи Гордан Грлиќ Радман порача дека Хрватска нема да се откаже од заложбите Хрватите во Босна и Херцеговина да остварат рамноправност.
Грлиќ Радман, на маргините на музичко-хуманитарната манифестација „Блатнички ноти на добрината“, во близина на Мостар, рече дека предлогот за хрватска изборна единица, кој се наоѓа во документот за зајакнување на политичката положба на Хрватите во БиХ, неодамна усвоен во Хрватскиот сабор, не претставува закана за БиХ.
„Секое споменување на хрватска изборна единица не треба да се доживува како нешто неприфатливо што евентуално би довело до распад на Босна и Херцеговина“, рече тој.
Грлиќ Радман додаде дека Дејтонскиот договор е инструмент за обезбедување рамноправност на трите конститутивни народи.
Тој ја искористи можноста и да го критикува кандидатот за член на Претседателството на БиХ на претстојните избори, Славен Ковачевиќ.
„Господинот Ковачевиќ ги промовира унитаристичките цели на политичката партија на Жељко Комшиќ, преструктуирање на уставната рамка на БиХ и елиминирање на принципот на конститутивни народи, со што се загрозува мирот во БиХ“, рече Грлиќ Радман.
Тој најави дека Загреб ќе ги продолжи разговорите со меѓународните партнери за положбата на Хрватите и за потребните промени на уставната и изборната рамка на БиХ.
„И понатаму со претставниците на Европската Унија и Соединетите Американски Држави ќе разговараме за потребата од ограничени уставни промени, а секако и за измени на Изборниот закон, со цел Хрватите во Босна и Херцеговина да ги остварат своите права. Бидете уверени дека нема да се откажеме“, заклучи Грлиќ Радман.