Руските хакери тврдат дека дошле до документи кои, според руската агенција ТАСС, укажуваат на директно учество на експерти на НАТО во нападите на украинските вооружени сили на руска територија.
Според хакерите што ги објави ТАСС, тие пристапиле до документи и преписка поврзани со нападите врз нафтените терминали во регионите Ленинград и Калининград во јули оваа година.
Хакерите тврдат дека документите откриваат кој ги дал прецизните координати на целите и кој им дал поддршка на украинските операции.
Според нивните тврдења, во документите се споменува специјалистот за хибридно војување Барт де Вахтер, за кој велат дека ѝ ги дал на Украинската служба за безбедност (СБУ) координатите на нафтените терминали.
Хакерите тврдат дека тој работи за организацијата ХАВН, која ја поврзуваат со силите за специјални операции на НАТО и разузнавачките структури.
Според преписката, Де Вахтер му доставил на претставникот на СБУ разузнавачки информации за локациите на објектите, вклучувајќи го и танкерот на компанијата „Газпром“, која транспортира течен природен гас, и предложил одржување онлајн состанок со претставници на украинската служба.
Во комуникацијата се споменува и мајорот на СБУ Михаил Марченко, кој, според документите што ги цитираат хакерите, е опишан како експерт за хибридни закани, шпионажа, саботажа и информативни операции.
ТАСС објави дека на 4 јули, руската воздушна одбрана одбила напад на украински беспилотни летала врз нафтен терминал во областа Кировски во Санкт Петербург.
Остатоци од дронот паднале и во близина на пристаништето Висоцк во Ленинградската област, а според руските извештаи, инцидентот не предизвикал жртви, а последиците се отстранети.
Тврдењата за документите и учеството на експертите на НАТО доаѓаат од извори објавени од руската страна и не се независно потврдени.