Антропик објави дека хакерските групи започнале кампања во која моделот Claude бил користен за автоматизирање на околу 30 напади врз корпорации и владини институции.
Најновиот извештај од Антропик, креаторот на популарниот модел на вештачка интелигенција Claude, откри дека хакерските групи поврзани со кинеската држава користеле вештачка интелигенција за автоматизирање на сајбер нападите врз корпорации и владини институции низ целиот свет.
Според извештајот, дури 80 до 90 проценти од активноста во нападите била целосно автоматизирана преку Claude, што покажува колку брзо технологијата на вештачка интелигенција станува моќна алатка не само во индустријата, туку и во рацете на сајбер криминалците.
Директорот за сајбер безбедност на Антропик, Џејкоб Клајн, рече дека хакерите го користеле Claude речиси без човечки надзор: „Човечката улога била сведена на неколку кликања – како „продолжи“, „не продолжувај“ или „дали си сигурен, Claude?“ Моделот го направил останатото.“
Иако Антропик не ги открил идентитетите на жртвите, потврдено е дека институциите на американската влада не биле меѓу нападнатите.
Случајот дополнително ги продлабочува загриженостите за злоупотребата на вештачката интелигенција, особено во време кога сè повеќе компании воведуваат алатки за вештачка интелигенција во нивното секојдневно работење.
Експертите предупредуваат дека автоматизираните напади би можеле да станат нов стандард во кибервојната, а откривањето на вакви активности ќе биде сè потешко.