Кандидатот за градоначалник на Општина Чаир од редовите на ВРЕДИ, Изет Меџити, одржа посебна средба со младите кои на овие избори ќе имаат можност да гласаат за првпат, се вели во соопштението од ВРЕДИ.
Оваа средба претставува значаен момент во изборната кампања, ставајќи го фокусот врз активното вклучување на новата генерација во демократските процеси.
„Денес за мене е голема чест и задоволство да се сретнам со младите од Општина Чаир, млади кои за првпат ќе можат да гласаат на овие избори“, изјави Меџити, потенцирајќи дека нивната енергија, идеи и визија за Чаир се инспиративни и му даваат нова мотивација во неговиот политички ангажман.
Меџити се потсети на својата младост и на напорите на неговата генерација да го афирмира гласот на Албанците во Скопје и Северна Македонија.
„Гласот на еден млад човек е една од највредните работи во демократијата. Со еден глас може да се промени правецот на општината, државата, иднината“, додаде тој.
Меџити нагласи дека младите од Чаир оваа есен ќе имаат можност да гласаат за конкретни проекти кои ќе го подобрат нивниот живот.
„Вие оваа есен ќе гласате за нов универзитетски кампус на Универзитетот ‘Мајка Тереза’, за нови базени во општината, за модерен спортски комплекс по примерот на Борис Трајковски, за младински центар со модерна библиотека и нови игралишта“, рече Меџити.
Тој ја истакна и важноста на оживувањето на културниот живот во Старата скопска чаршија, како дел од визијата за еден активен, инклузивен Чаир ориентиран кон младите.
„Оваа генерација која за првпат ќе гласа ќе ја напише новата страница на Чаир. Нивниот глас е моќен, нивната одлука е иднината, а јас сум горд што можам да бидам дел од таа промена“, заклучи Меџити.