Американскиот претседател Доналд Трамп изрази длабоко незадоволство од руското бомбардирање на Украина во текот на викендот, велејќи дека не е задоволен од рускиот претседател Владимир Путин.
„Не знам што му е. Што, по ѓаволите, му се случи? Тој убива многу луѓе. Не сум среќен поради тоа“, им рече Трамп на новинарите на аеродромот во Мористаун, Њу Џерси, додека се подготвуваше да се врати во Вашингтон.
Трамп ги даде забелешките како одговор на руските воздушни напади врз украинските градови во текот на ноќта во неделата, вклучувајќи го и главниот град Киев.
Малку подоцна, Трамп го даде истиот коментар на својата мрежа.
„Отсекогаш сум имал многу добри односи со Владимир Путин од Русија, но нешто му се случи. Тој целосно полуде! Тој убива толку многу луѓе без потреба, а јас не зборувам само за војници. Ракетите и беспилотните летала гаѓаат врз градовите во Украина без причина.
Исто така, претседателот Зеленски не и прави услуга на својата земја со начинот на кој зборува. Се што ќе му излезе од устаta прави проблеми, не ми се допаѓа, а подобро да престане.
Ова е војна што никогаш немаше да се случи ако јас бев претседател. Ова е војна на Зеленски, Путин и Бајден, а не на „Трамп“. „Само помагам да се изгаснат големите и грди пожари кои беа подметнати поради голема неспособност и омраза.
Руските сили истрелаа 367 беспилотни летала и ракети во текот на ноќта во неделата врз украинските градови, вклучувајќи го и главниот град Киев, во најголемиот воздушен напад на војната досега, при што загинаа најмалку 12 лица, а десетици други беа ранети.
Трамп се обидуваше да ги натера двете страни да се согласат за прекин на огнот во тригодишната војна во Украина, а минатата недела разговараше повеќе од два часа со Путин.
Тој ја покрена можноста за воведување дополнителни санкции кон Русија како одговор на тековните напади.