Поради обемните безбедносни мерки преземени од властите поради можни неовластени протести по повод Меѓународниот ден на трудот, денес во Истанбул беше блокиран копнениот и морскиот сообраќај во неколку правци, а јавниот превоз помеѓу европскиот и азискиот дел од градот беше речиси прекинат, објави Хуриет.
По наредба на Канцеларијата на гувернерот на Истанбул, блокирани се бројни патишта, фериботски линии и линии на јавен превоз, а линиите на метрото се суспендирани на десетина централни станици во близина на плоштадот Таксим и околните населби.
Централниот плоштад Таксим во Истанбул беше затворен со бариери за контрола на толпата, а илјадници полицајци беа распоредени за да го ограничат пристапот, вклучително и од споредните улици што водат до Таксим и населбата Бејоглу.