Израелскиот премиер Бенјамин Нетанјаху денеска изјави дека повикот на францускиот претседател Емануел Макрон за ембарго за оружје на Израел е „срамотен“.
„Додека Израел се бори против варварските сили предводени од Иран, сите цивилизирани земји треба цврсто да застанат на страната на Израел. Сепак, претседателот Макрон и другите западни лидери сега повикуваат на ембарго за оружје против Израел. Срам да им е“, рече Нетанјаху, а пренесе Тајмс на Израел.
Нетанјаху вети дека Израел ќе победи „со или без поддршка“.
„Но, нивниот срам ќе продолжи долго откако ќе се победи војната“, истакна Нетанјаху.
Тој рече дека Израел ја брани цивилизацијата од оние кои сакаат на сите да им наметнат „темно доба на фанатизмот“.
„Бидете уверени, Израел ќе се бори додека не се добие битката – за наше добро и за доброто на мирот и безбедноста во светот“, нагласи Нетанјаху.