Помошникот генерален секретар на НАТО за јавна дипломатија Колинда Грабар Китаровиќ денеска пред студентите и професорите од Универзитетот на Југоисточна Европа во Тетово одржа предавање „Улогата на НАТО во новиот свет“.
На предавањето присуствуваше министерот за одбрана Талат Џафери го најави 15-от циклус од Акцискиот план за членство во НАТО, кое Македонија наскоро ќе го почне.
– Република Македонија својата иднина ја гледа во членството во НАТО и во ЕУ. Гледано од перспектива на Република Македонија, НАТО е клучниот столб на современата евроатлантска безбедносна архитектура, додека на ЕУ се гледа како на главна движечка сила за демократски, економски и општествен развој на целиот европски континент, изјави Џафери.
Колинда Грабар Китаровиќ во предавањето имаше охрабрувачка порака до Македонија за евроатланските интеграции.
– За земјите од Западен Балкан, ЕУ и НАТО носат придонес за младите генерации и нивната иднина. Изолацијата не помага, создава затворени општества и го зајакнува национализмот. Се надеваме дека условите за вашето членство ќе бидат исполнети, а добрососедските односи се меѓу најважните за членство во НАТО. Знам колку е тешко, но можам да ве поддржам да продолжите со напредокот, не само за разрешувањето на спорот со името туку и во зајакнувањето на институциите, имплементација на Охридскиот рамковен договор, слободата на медиумите и сите други апекти кои се за доброто на граѓаните, рече Грабар Китаровиќ.
Според министерот Џафери, Македонија очекува дека Алијансата и во иднина ќе продолжи да биде главниот столб во справувањето со безбедносните предизвици и закани, не само на европско тло, туку и пошироко во евроатлантската област.
