Во Црна Гора денеска се одржува вториот круг од претседателските избори на кој граѓаните на таа земја ќе го изберат шефот на државата меѓу Мило Ѓукановиќ и Јаков Милатовиќ. Право на глас на изборите за претседател на Црна Гора имаат 542.154 граѓани, а избирачките места ќе бидат отворени од 7 до 20 часот, додека првите (прелиминарни) резултати ќе бидат објавени во 21 часот.
Мило Ѓукановиќ, актуелниот претседател на Црна Гора и кандидат на неговата Демократска партија на социјалистите (ДПС), освои 35 отсто од гласовите во првиот круг на 19 март. За време на кампањата тој се претставуваше како проевропски кандидат и го обвини Милатовиќ дека е експонент на великосрпската политика на Александар Вучиќ.
Контракандидатот Јаков Милатовиќ од Движењето Европа сега освои 29 отсто од гласовите на гласачите кои излегоа на гласање во првиот круг. Тој е поранешен министер за економски развој во првата влада формирана по парламентарните избори одржани во август 2020 година, на кои ДПС на Ѓукановиќ го загуби мнозинството во парламентот за првпат по три децении.