Европратеникот Ангел Џамбаски, познат по антимакедонските ставови и еден од најгласните поддржувачи на ветото кон Македонија, му порача на министерот Бујар Османи дека Бугарија нема да прави компромиси со историската вистина.
Џамбаски беше испровоциран од интервјуто на Османи за македонска национална телевизија во која министерот за надворешни работи откри дека наративот во историската комисија наметнал мултиперспективност на погледите, односно две верзии на историските толкувања.
„Таа перспектива може да се стави во учебниците, но само доколку се одобри од страна на комисијата, а таа е автономна и нема рокови. Сите овие шпекулации дека Бугарија ќе ни наметне нешто се неточни и никој нема да ни ги земе книгите“, рече ОСмани.
Џамбаски порача дека не може да се претстават две верзии на историјата бидејќи таа била само една.
„Бугарија нема да прави компромиси со историската вистина. А таа господине Бујар Османи е дека Самуил е бугарски цар, а Гоце Делчев е Бугарин. А, ВМРО секогаш се бореше за ослободување на Бугарите во Македонија. Не може да се претстават две верзии на историјата, бидејќи таа е една, наша, заедничка, за која има милиони сведоштва и за која зборуваме во Договорот за добрососедство. Сите други толкувања се недозволиви и ја поддржуваат лагата на македонизмот“, напиша Џамбаски на социјалните мрежи.