Автобусот на Европската унија денеска престојуваше во Миравци во рамки на активноста „ЕУ одблизу“, чија цел е директна комуникација на делегацијата на ЕУ со граѓаните од руралните области и непосредно презентирање на добивките и обврските од зачленувањето во Европската унија.
Жителите на Миравци имаа можност да добијат подетални информации од тимот на ЕУ предводен од словачкиот амбасадор Роберт Кирнаг и заменик амбасадорот од ЕУ делегацијата Роберт Лидел.
– Со оваа програма настојуваме да ја доближиме Европската унија до граѓаните на Македонија. Автобусот на ЕУ наиде на извонреден прием како кај учениците на ООУ „Климент Охридски“, така и кај граѓаните на Миравци кои за време на средбата покажаа огромен интерес за функционирањето на унијата, изјави Лидел.
Кратко предавање за Европската унија беше одржано пред учениците од Миравци кои потоа учествуваа во наградни игри и квиз на знаење за Европската унија.